Éi veggio
(Il vecchio)
Da quande cu s’è rutto sutta l’anca
u pó ch’u’n voggia manco ‘na palanca,
cu éi scrósse e c’un caretto pre stò sú,
ma da zuno u curiva ciú che ‘n rlú;
u curiva cu tanti otri dermoggi
che a Natole i spitovo zà i Remoggi.
E dóppo ‘n pó, l’è gnúo in tócco ‘d zunótto,
id quéi che ‘i fie i si sernéivo a bótto;
ma lé, che zà l’avéiva piò l’armío,
u na guei sinquantò per fose u nio.
E u múgiova u só gran ‘ntéi cuve ‘d l’ea,
e u tegniva i búgòtti per la sea,
e a San Martin u cuntova i dinè,
e i fiöi chi gnivo sun tútti scampè.
Davanti aa géza u se lvova éi capé,
e u s’aracumandova l’anma au sé;
du restante u ne stova a ferlucò,
ma l’è partio, quande chi l’an ciamò.
E pö, turna camgogne e turna lcéa,
ma sitto, e sénsa moi cangiò bandéa.
E dóppo avéine viste ‘d crúe e’d cötte,
aa fin du giurno, e ‘n pó primma da nötte,
óua cl’è víduo, stanco e acaratò,
ch’u ‘n fa ciú éi vighe e l’órto, e u ‘n pö sapò,
i fiöi, i névi, éi nesse, i zenni, éi nöje,
an dito cu g’avéiva déi listöje,
ma u ‘n gh’è mancova i sódi, e i l’an purtò
‘nti ‘n pósto bello, própio atocco ai mò,
cu a strapunta cu l’egua, tante ciante,
e ‘n lögo cu paxéiva ‘n risturante.
E ‘nta terossa, sutta ái parasù,
u pizurgnova e u pregova u Segnù:
“Coo éi mè Segnù, che ti-t ne stè lì’n cruxe,
an te distúrbo, s’at doggo na vuxe?
Fóscia l’éa méjo s’am ne ‘ndovo primma,
sénsa spitò ch’im muchesso ‘nta simma.
Óua, a capisso che ti ‘n fè ‘d bun péizo,
perché anche ti, che t’é Segnù, t’é apéizo,
ma mi, óu faxéivo ‘ntu scupé e ‘ntu stò,
e pö, u ‘n me custa ninte dumandò.
Éi suóre chì, sun brove e i gh’an pasiénsa,
ma u-gh vuréiva in pó meno cunfidénza:
mi a-m lavovo ‘nta riaña, aa só stagiun,
ma chì im ribotto me na muè ‘n pupun.
Um piazréiva séntìme turna ‘n troppa,
sguernò da néive, e béivime da groppa.
A vuréiva na tópia ben cagiò,
a vuréiva déi vin da ‘mbutigiò.
A vuréiva a me xotta ‘nta scúdlèa,
a vuréiva sigulle e scursunea,
e a vuréiva rzújò déi péje dúe,
sénsa puréj o, méno ncù, spremúe.
E a sun stúffo id papiñe cu l’amé:
damme ‘n beródo o na custiöa ‘d pursé.
A vuréiva éi me pégue, éi me pulò;
a vuréiva éi me vocche da laciò;
a vuréiva éi me coro cu i me böi...
ma ciú che tútto, a vurè vegghe i fiöi”.